瑞典南部單車遊(下)-Lund隆德大學城

文: 路易斯

其實精明嘅讀者喺睇前傳嘅時候,都應該會發現其實我有一日係去咗Lund嘅。咁前兩日都無講Lund,最後一篇當然就係寫Lund嘅旅程啦。Lund係瑞典最古老嘅城市嚟,歷史比起Malmö同Stockholm都要悠久。今時今日嘅Lund比較似一個大學城,充滿住學術氣息,而的確當地人口中學生係佔好大嘅比例,當地嘅University of Lund亦係瑞典以至整個北歐最頂尖的大學之一。

由Malmö出發,沿住Stockholmsvägen斯德哥爾摩路,然後轉去Lundavägen 隆德路,一直行約20公里就到,整條路比起尋日嗰條直接平坦得多,而且全部係單車徑完全唔需要踩出馬路。不過沿途附近都係小鎮同高速公路,無尋日嘅田原風景咁引人入勝了。

圖1

[圖1:單車徑有清晰指示講明方向]

圖2

[圖2:離開咗Malmö嘅行政區域,踩一陣就黎到全瑞典第二細嘅Burlövs布爾勒夫市,出名無湖無森林無河流,但有好多嘅電纜同公路]

圖3

[圖3:Burlövs市首府Arlöv以製糖業聞名,圖中係當地教堂]

圖4

[圖4:去Lund之前仲要再經過多一個Staffanstorp斯塔凡斯托普市]

經過兩個多小時嘅路程(同樣Google Map表示只需要一個鐘多啲),終於黎到Lund!市中心外圍第一個景點就係Stadsparken市鎮公園啦。

圖5

[圖5:好寧靜嘅湖,係散心拍拖嘅好選擇,啲雀仔唔怕人咖,你可以行到好近影相]

圖6

[圖6:我真係好中意北歐啲公園,啲設計好靚好配合小朋友嘅幻想]

圖7

[圖7:公園旁邊嘅游泳池,條滑梯好吸引呀!!!!!!]

行完公園,然後就長驅直進入去市中心,參觀Lund嘅舊城區,感受吓當地悠長嘅歷史。

圖8

[圖8:古城區的街道,地下都是石塊鋪砌而成,唔係水泥路]

圖9

[圖9:市中心廣場Stortorget,是大會堂、遊客中心嘅所在地]

圖10

[圖10:著名嘅Lunds domkyrka隆德主教座堂,於11世紀末12世紀初開始建造,係當時北歐地區,尤其係丹麥王國嘅宗教核心]

肚餓了,經過附近嘅廣場Mårtenstorget,竟然有International food fair!!!!基於遲啲會去歐洲玩,所以唔食歐洲菜,揀左我未食過嘅澳洲菜,估唔到袋鼠肉都唔錯~

圖11

[圖11:Mårtenstorget的food fair,好多唔同國家嘅菜呀]

圖12

[圖12:睇落比較頹而且無咩人幫襯嘅北歐食物車,大概同南歐菜相比,北歐菜係有點失色吧………(不過都好過賣熱狗果檔美國菜咖啦)]

食飽飽,離開Lund之前,當然要去埋大學城參觀下啦。

圖13

[圖13:好中世紀感覺嘅拱門]

圖14

[圖14:大學圖書館]

圖15

[圖15:好專業、設備好齊全嘅天文學院!其實大學城其他學院感覺都好專業,例如科學院嘅校園設計就有啲工廠的感覺]

其實Lund係一個好細嘅城市,半日大致上都可以圍繞最主要嘅景點兜一個圈。當然每個地方要深度遊係可以用好多時間,不過我由於要返去Malmö趕火車回Göteborg,所以無逗留太耐。

探索歐洲,用腳走遍每個角落,細味每一個城市固然係一個令人嚮往嘅遊玩方式。但有時行路實在太花費時間,而歐洲出名係單車天堂,偶爾用單車代步亦未嘗唔係一個好嘅方式嚟,有單車亦代表你去嘅地方可以更多,而且仲可以慳到市內搭車嘅交通費!但要緊記,出發前要好好鍛鍊體力啊(小弟表示今次三日旅程加埋踩左應該有近150公里,大概係出世以嚟踩過嘅路程加埋都無咁多。除左肌肉酸痛之外仲疑似整傷咗啲筋骨,返到Göteborg第二日行路要拐下拐下,對腳同臀部痛咗半個星期先無事)!拋咗一大舊磚,希望引到大家一齊過黎北歐用單車遊世界,發掘多啲唔同嘅地方啦:)

 [後記:由Malmö去Lund果20公里嘅距離係咩概念?20公里,由小弟居住嘅坑口站起計,20公里係去到西環嘅盡頭西環泳棚。小弟往來Lund嘅沿途,都見到唔少人踩同一條路線。其實一個城市往來第二個城市,大可以唔洗等巴士逼地鐵,簡單一條單車徑就夠晒。喺城市規劃方面,香港實在過份落後,完全唔似一個先進國家應有嘅水平。當人地講緊後物質生活嘅時候,喺香港呢個咁富庶嘅地方,政府同社會主流仍然仲係講緊錢、錢、錢同錢,仿佛人嘅生活只有錢,仿佛錢可以買到生活,可惜香港係有錢都好難買到生活,莫講無錢。小弟仲年輕,今年先廿二歲,希望有生之年可以睇到香港都好似北歐咁充滿單車徑、充滿康樂設施,社會不論階層都可以享有平等嘅「生活」權利,包括自由享用公共空間嘅權利。Live Norish其中一個好重要嘅元素,就係背後果種充滿社會民主主義色彩,強調平等正義嘅生活方式。]

 

瑞典南部單車遊(中)-最南端的海角Smygehuk

文: 路易斯

上回提及,瑞典交換生喺Skåne首府Malmö租咗兩日半單車,而且第一日喺Malmö玩完啦,咁到底第二日去邊好呢?Skåne咁大,唔好好運用架單車四圍去點對得住嗰300 SEK嘅租金?當然就係去郊外啦!是日,一年都踩唔到一次單車嘅我非常大野心,雖然尋日踩左半日單車已經十分攰,但都忍受住大腿同臀部嘅痛楚(無錯,踩單車最痛苦其實係臀部),決定挑戰來回90公里嘅路程,前往瑞典、以及整個斯堪地那維亞半島最南端嘅海角Smygehuk!

一大早起身,離開Malmö市,就沿住101公路往東南偏東方向踩往Anderslöv安德斯略夫市。公路沿途大部份路段都有單車徑,但亦有唔少運動車手唔用單車徑直接踩馬路,對此駕駛人士都好禮讓。

圖1

[圖1:連接住Malmö同多個南部城市嘅101公路]

圖2

[圖2:離開Malmö,進入Vellinge kommun韋靈厄市]

圖3

[圖3:然後再去到Trelleborgs kommun特雷勒堡市嘅範圍]

離開左Malmö嘅城市氣息,取而代之嘅係鄉村小鎮風情。感覺同睇電影嗰陣,啲電影主角一個人喺鄉下踩單車嗰種氣氛一模一樣。深入田野,萬里無人嘅時候,我仲有一種拍緊 Walking Dead死剩自己一個喺郊區四圍搵同伴嘅感覺添哈哈哈哈哈。

圖4

[圖4:沿途都係呢啲無窮無盡嘅田野同草地,非常之心曠神怡呀~~~~]

圖5

[圖5:繼續綠田原~~~~]

圖6

[圖6:係香港大概無咩機會感受呢種「踩左十年終於見到個town嘅感覺」]

去到Anderslöv就可以離開101公路,繼續穿越田野直線向南面落去Smygehuk啦,終於到達目的地可以打卡!Smygehuk其實只係一條小漁村,無咩特別,成個地方都唔係好遊客嘅感覺,嚟嘅全部都係渣車嘅本土瑞典人,得我一個外來遊客傻豬豬踩幾十公里過黎 :0)

圖7

[圖7:專登有個告示牌話你知呢度係最南端,有埋經緯度]

圖8

[圖8:仲有一大個路牌話你聽去世界各大城市嘅方向同距離。留心睇嘅話會見到Stockholm下面,Moscow上面有一個不明地方Treriksröset,呢個地方就犀利啦,除左係瑞典最北端之外,而且佢英文名仲係叫做Three-Country Cairn,即係瑞典、芬蘭同挪威三國國界交匯嘅地方嚟]

打完卡食件三文治又係時候要走,因為回程都需要時間加上無咩睇,所以唔留太耐。時間關係,稍稍向西走去附近比較大嘅城鎮Trelleborg之後,就揀返路程最短嘅101公路原路返去Malmö了。

圖9

[圖9:Trelleborg係附近難得似返個市區嘅地方]

圖10

[圖10:又返去了無人煙嘅郊區]

圖11

[圖11:估唔到有家人會收埋隻古董船,個設計完全係以往維京船果啲樣嚟]

圖12

 [圖12:辛苦左成日見到Malmö嘅呢個牌雖然好滾動,但其實唔好開心得太早,因為仲要踩多個幾鐘先返到去Hostel…….]

圖13

[圖13:可能因為Malmö歷史悠久,所以有個石像路標?]

圖14

[圖14:返到市區,路經惡名遠播嘅移民/貧民區Rosengård,其實感覺都唔係咁差啫,至少我覺得自己作為一個遊客係安全嘅]

好啦,經過一日辛苦嘅路程,終於返到去Malmö!稍作休息,訓返一晚,最後一日再搏盡踩多40公里去另一個城市!想知我去咗邊?請繼續留意最後一集嘅瑞典交流生單車之旅!

(後記:話說根據Google Map,呢90公里路其實只需要4個半鐘就可以完成。希望大家唔好笑我,因為,我實在係無平日做運動嘅習慣,加上我一年都踩唔到一次單車,所以係做唔到長時間連續踩時速20公里嘅。我只可以去到大家一般喺吐露港拍拖踩下休閒單車果種緩慢嘅速度,結果連埋中途停低休息、睇下風景影下相,我係用左10個鐘先完成路程,再加上踩完之後個人接近癱瘓咁濟 :0)

故事教訓大家平日一定要做多啲運動,同埋無做開運動嘅記得量力以為唔好逞強 :0))

瑞典南部單車遊(上)-Malmö馬爾默

文: 路易斯

前傳交代晒啲背景資料,就係時候入正文講返個旅程啦。今次其實我都係好隨心咁周圍去,而第一日就當然梗係玩左Malmö先啦。首先就係由Centralstation中央車站出發,經過Universitetsbron大學橋,去到Västra hamnen的高級住宅區,幻想吓有錢人嘅生活哈哈。

 

圖1 (1)

[圖一:係Universitetsbron回望市中心,出發~~~]

圖9

[圖二:Västra hamnen的高級住宅區Dockan Marina,嗚呀人地啲樓其實好平,左手邊最盡頭特別高白色果棟樓,890呎三房海景單位賣緊334萬港紙咋]

去完人地屋企,就順手過隔離參觀吓啲公園,睇吓有咩玩啦,又順手睇吓北歐的小正太(北歐細路仔真係好QQ咖~心心眼~)。

圖5 (1)

[圖三:喺高級住宅區隔離嘅Stapelbäddsparken,小正太們好熱血咁玩滑板,家長們就自己坐埋一邊吹水都太理會小朋友會唔會跌親]

圖4 (1)

[圖四:Stapelbäddsparken除左滑板之外仲有得攀石!好多野玩!]

圖3 (1)

[圖五:附近的另一個公園Varvsparken,設計都有少少科幻]

圖6 (1)

[圖六:架空橫過路中心的繩索橋,唔知點解我好中意呢個設計LOL]

嚟到Malmö呢個沿海城市,又點少得去欣賞下佢嘅海岸線呢?所以我跟住落嚟就去左Scaniaparken、Daniaparken同埋Ribersborgsstranden呢三個主要嘅沿海公園度享受下陽光與草地啦~

圖7 (1)

[圖七:Scaniaparken的泳棚──同西環泳棚一樣,都係一個平台伸延出海中心然後你自己跳落水玩,無救生員無防鯊網乜都無,連沖身設施都唔覺有,但係北歐好興呢啲泳棚,佢地無咩好正式有晒救生員的沙灘俾你游水]

圖8

[圖八:Daniaparken一個伸延左出海的觀景台,估唔到咁都有人掛愛情鎖,其實想人掛愛情鎖呢就唔洗學大埔區議會on99咁搵幾百萬起條爛鬼橋加個告示牌嘅,只要地方靚人地自然會掛]

圖11

[圖九:沿海邊都好多呢啲休閒露天café,大家都係求其泊架單車喺附近,好自由自在~]

圖10

[圖十:Ribersborgsstranden咁啱撞到有人賣舊書,5蚊一本,乜種類嘅書都有,負責人話啲人搬屋成日唔要啲書,咁收吓收吓就收左咁多書,就拎出黎義賣俾路人]

去完海邊又兜返去市中心同埋舊城區睇下啦,話晒Malmö同Stockholm一樣係全瑞典最古老的城市之一,點可以唔參觀下Gamla staden舊城區同古建築呢?

圖2 (1)

[圖十一:Slottsträdgården望返過去賭場Casino Cosmopol Malmö,其實小弟都係第一次見到瑞典有Casino]

圖12

[圖十二:古城堡Malmöhus Slott]

圖13

[圖十三:唔止荷蘭有風車架,其實瑞典都有XD]

圖14

[圖十四:舊城區中心的廣場Lilla torg]

由於呢個時候瑞典南部近夜晚8點先日落,所以參觀完舊城區仲有好多時間返去海邊Vågbrytarvägen同Sibbarpsfältet睇夕陽啦,然後就完結我第一日嘅旅程啦!

圖15

[圖十五:沿途經過Malmö的大商場Triangeln,人地都係下面商場上面住宅,但起得靚過香港啲屏風樓十萬倍……….]

圖16

[圖十六:Sibbarpsfältet的海邊石灘望出去,左邊係連接住瑞典同丹麥嘅大橋Øresund Bridge]

節目預告:嚟緊下一集小弟會踩90公里單車去一個神秘郊外地方,踩到腳都軟埋,付出好大架,萬勿錯過!

瑞典南部單車遊(前傳)

文: 路易斯

話說瑞典交換生因為某啲原因好遲先攞到下半個學期時間表嘅關係,所以無預先買定機票復活節去玩,臨時臨急3月最尾果幾日先嚟計劃旅行,到底有咩平靚正嘅選擇呢?結果就係距離Göteborg哥德堡市近三小時火車嘅最南部省份Skåne län斯堪尼省啦。為免篇文過份地長而大家Too Long Didn’t Read,所以小弟決定將三日嘅旅程拆散為4篇文方便大家閱讀啦!而第一篇前傳,就會簡單介紹吓瑞典嘅單車配套。

歐洲一向係Bicycle friendly(中譯為「單車友善」乎?)嘅國度,可以話係單車發燒友嘅天堂之一。小弟今次嘅旅程以Skåne län的首府、瑞典第三大城市Malmö馬爾默市為中心點,Malmö亦都好大口氣地稱號自己做Cykelstaden單車之城(的確,根據2013年Copenhagenize Index,Malmö係單車友善的城市當中排名第七)。經過Tourist Information Centre嘅介紹同自己嘅資料搜集,就去左鄰近Centralstation中央車站嘅Travel Shop租車。一架普通 3 Gear的城市用單車每日租金150 SEK(折合約130幾蚊港紙),而小弟十分幸運,遇上非常好人嘅店員,只需要交2日租金(300 SEK)就俾我租夠兩日半(由星期日中午至星期二傍晚),而且仲俾左一架 7 Gear的單車我。

圖0

[圖零:告示牌──歡迎來到單車之城馬爾默]

到底呢度有幾單車友善?首先,單車徑網絡極為完善發達,以Malmö為例,單車徑近乎係連接晒市內大大小小嘅地方(唔似得香港咁,連公園都唔俾踩單車咁膠),而且更加伸延至市郊地方,以及鄰近城市。所有單車徑都有清晰路牌指明方向,唔怕盪失路。

圖1

[圖一:圖中綠色嘅都係單車路,可惜通往哥本哈根嘅大橋唔俾單車行,本身我係想踩埋過去丹麥嘅。不過根據報導,有瑞典公司已經提議緊加建單車徑!!!!]

圖2

[圖二:沿路好多呢啲指示牌指明方向,真係Google Map都唔洗check]

圖3

[圖三:人地城市仲會喺入口設立Cykel Karta 單車地圖俾大家參考下市內嘅單車徑位置,呢度係Lund隆德往Malmö方向嘅單車徑入口]

而且單車徑好多時會同行人路和車路分開,唔會人車爭路,確保大家安全。即使要踩馬路,基本上只要唔係高速公路都可以踩(有時我踩嘅車路,速度限制係去到80公里),靠右邊踩就係,沿途啲車見到你都會自動減速以及駛近中線,同你保持安全距離,以免雙方有危險。而且瑞典司機亦都已經好習慣馬路好多單車,佢地係唔會覺得你阻X住晒條路嘅。

圖4

[圖四:有時候,喺馬路中間都會有畫左特定嘅單車徑,圖中地方係University of Lund 隆德大學附近]

另一方面,瑞典嘅單車過路處仲有設置專俾單車睇嘅交通燈,同行人/汽車嘅交通燈係分開咖,經過觀察,單車燈會俾行人燈早一至兩秒轉綠燈,但我唔知道背後原因係咩哈哈。

圖5

[圖五:單車嘅交通燈,其實唔知整黎做咩,睇行人燈都足夠啦,而且日光充足嘅時候基本上唔會睇到著緊邊盞燈LOL]

此外,瑞典四處都係單車泊位,佢地嘅單車泊位除左唔會俾一堆俾人偷晒零件嘅爛單車霸住晒之外,係Malmö市一啲大型泊位仲會附設一個免費嘅輪胎充氣設施,俾大家隨便用。

圖6

[圖六:市政府興建的單車充氣設施]

另外值得一提嘅係,有啲城市例如Göteborg同Lund係有公共租車服務嘅。以Göteborg嘅Styr & Ställ為例,市內有超過60個自助租/還車點,十分方便,而且價錢亦相當吸引,一年只需要75 SEK就可以做會員無限租車(遊客可以用25 SEK做3日會員)。租車的首30分鐘完全免費,目的係鼓勵大家用30分鐘就還車,令大家可以輪流使用有限嘅資源。亦係呢個原因,所以租金係採取累進制,首30分鐘免費,第二個30分鐘就收10 SEK,第三個30分鐘就20 SEK,第四個或以上嘅30分鐘就係40 SEK(真係好北歐式嘅公平概念啊)。而佢地都好老實講到明,如果你想免費地長時間租車,只需要每30分鐘還一次車就可以,每日嘅租車次數係無限制嘅。

圖7

[圖七:Göteborg嘅Styr & Ställ租車服務

By Tomasz Sienicki [user: tsca, mail: tomasz.sienicki at gmail.com] (Photograph by Tomasz Sienicki (Own work)) [<a href=”http://creativecommons.org/licenses/by/3.0″>CC BY 3.0</a>], <a href=”http://commons.wikimedia.org/wiki/File%3ACitybikes_in_Gothenburg%2C_Styr_och_staell_-_2012_ubt.JPG”>via Wikimedia Commons</a> ]

最後,呢度踩單車嘅規矩好簡單──靠右,夜晚要著燈,遵守燈號。為安全起見,都建議戴頭盔同埋著反光衣。呢度日常人踩嘅單車都好多花款,可以外掛架載貨嘅車仔甚至係BB車都得,真係唔怪得佢地去邊都踩單車了。講左咁多,下一篇就開始介紹我真正去嘅地方啦,Stay tuned!

 

北歐神話的另一面:大城市中的Ghettos

文: 路易斯

Ghetto這個字,根據維基百科,最原本是用來形容猶太人集中居住的地區。我第一次認識這個字,是大學一年級的社會學課堂,指的是社會上的少數(Minorities)集中居住的地方,而他們可以是階級、種族或者文化上的少數。向來,奉行社會民主主義(Social Democracy)的北歐社會在香港的知識份子,尤其是左翼知識份子的眼中,都仿佛是一個烏托邦,以至我在大學三年修讀的社會行政學課堂中都沒有聽過甚麼關於北歐的負面說話。

一星期前,我身處的瑞典第二大城市哥德堡Göteborg發生了一宗頗為震驚國內外的槍擊案。兇徒用自動武器在餐廳內掃射,造成兩人死亡,十多人受傷,警方懷疑案件與黑幫仇殺有關。槍擊案的地點是Vårväderstorget,位於市中心以北Biskopsgården區域。該區是哥德堡其中一個著名的Ghetto,是貧民和移民集中的區域,所以也有論調將罪案與移民問題連上關係。我大學未有用功讀書,不懂得拋一大堆理論去分析社會現象,只想藉文章將北歐比較少為人留意的一面呈現給大家,當知多一點東西吧。 

北歐神話的另一面:大城市中的Ghettos

槍擊案現場餐廳,首相早幾日曾到場憑弔,但據報並不受居民歡迎。 

Ghettos與百萬建屋計劃 Miljonprogrammet

要講Ghettos,必先要提一下瑞典於1965開始、為期十年的百萬建屋計劃-Miljonprogrammet(The Million Programme),因為這些Ghetto好多都是當年Miljonprogrammet發展的區域。

二十世紀初期的瑞典是一窮二白的,以至很多瑞典人為了生計都移民去美國。戰後瑞典因為未受戰火摧殘得以發展,而且成就亦比較其歐洲鄰國驕人。然而,急速發展的背後卻帶來嚴重的住屋問題:房屋發展追不上快速的工業化和城市化,很多人仍然居住於殘舊而設備不足的市郊小屋,而且大量鄉郊人口遷入市區亦令城市出現房屋短缺,整體的居住和衛生環境十分惡劣。有見及此,執政的社會民主黨(Sveriges socialdemokratiska arbetareparti,The Swedish Social Democratic Party)提出並實行了百萬建屋計劃,務求在十年內興建一百萬個單位,為市民提供價格合理的房屋,解決住屋問題,結果務實的瑞典人十年未夠就已經超額完成計劃。

 

北歐神話的另一面:大城市中的Ghettos

典型的Miljonprogrammet兩房單位平面圖,供4人家庭居住。
若是在上面提及的Biskopsgården區域,月租只需約4700元瑞典幣,折合約港幣4300元。 

北歐神話的另一面:大城市中的Ghettos

大廈入面的走廊設計。 

每個Miljonprogrammet的社區都好比一個新市鎮,教堂商場學校等文娛商業設施一應俱全。然而,計劃卻備受爭議。當中最為人詬病的,主要是社區偏遠的地理位置,其次大廈冷冰冰的水泥外表。出於務實主義,政府所建的房屋大都一式一樣,而且不乏高樓大廈,完全顛覆了瑞典小鎮紅頂小屋的傳統形象。加上社區遠離市中心,站與站之間的車程頗長,而且社區多被荒山野嶺包圍,令社區給人一種很「隔離」(Segregation)的感覺。所以當瑞典人富起來以後都逐漸搬出,餘下的大多人都是低收入、無業的新移民或難民,形成一個個的Ghettos。 

北歐神話的另一面:大城市中的Ghettos

位於哥德堡Bergsjön的典型的Miljonprogrammet區域,被大片森林包圍,乘坐電車往市中心約需時二十多分鐘。 

今時今日的Ghettos風貌

槍擊案發生後,Ghettos內的社會問題再度引起舉國上下關注。很多人說這些Ghettos的失業率和罪案率異常地高,有些地區甚至連警察都抗拒巡邏。在剛過去聖誕和新年假期,單單是槍擊案所在的Biskopsgården已經發生了多宗縱火案,而且還有警察和消防員被幫派份子用煙花攻擊。這些事件都引起我的好奇心,所以我就去了哥德堡三個最出名的Ghettos社區:Biskopsgården、Angered和Bergsjön,窺探一下這些社區到底是甚麼樣子的。然而我不善言談,加上作為亞洲人在區內徘徊都已經引來好多注意,所以沒有找來居民傾談一下日常生活,下文只會簡單描述一下Ghettos社區的風貌。 

北歐神話的另一面:大城市中的Ghettos

槍擊案後Vårväderstorget明顯多了警察巡邏,平日在街上好日都見不到一個警察,但單單是今晚就在區內見到兩部警車。 

往來這些社區的幾條電車線,移民乘客的比例明顯較多,有時候車上至少一半人都是有色人種,街上也是有色人種為主,白人較少(我也不太懂得分辨白人是歐洲移民還是本土瑞典人)。如上文所述,社區的位置稍為偏遠,從市中心乘電車出發約需二十多分鐘的車程。雖然說是離市區較遠,但都只是二十多分鐘的車程,我平時從將軍澳去中環也要半小時吧,二十多分鐘根本不算是偏遠,尤其外國地方大而人煙稀疏。縱然如此,這些社區給我的感覺都是很孤立、被隔離的,因為它們大多是在市郊森林或山野中開墾的衛星城市,除了道路以外很多時跟市中心沒有其他連繫。而且在電車途經的隧道都比平時的多,Angered區域更有一個電車站是在地底的(要知道,哥德堡的電車多在地面行駛,隧道真的比較少見,地底車站更是我第一次見),明顯就是自成一角,跟市區有很大的分別,難怪移民都感到被排斥而且難以融入社會。 

北歐神話的另一面:大城市中的Ghettos

往Biskopsgården的電車線,車上明顯非白人較多。 

北歐神話的另一面:大城市中的Ghettos

Hammarkullen站,暫時在哥德堡所見唯一的地底電車站,充滿外國風情。 

雖然這些區域被大眾媒體稱呼為Ghettos,但絕對不是我們平常想像中的貧民區那般殘破不堪,甚至我都懷疑是否應該叫這些地區做Ghettos。街道不見滿地垃圾,只是建築較為殘舊密集,而且塗鴉比市區多一點點,但比起香港仍是好上一大截。圖中所見小孩平日也可以很安心的上街玩,偶然街角會有幾個非裔或中東裔的青年聚集,但為數不多。我在日間和晚間都有拜訪過這些區域,因為商店不多的關係(只有三數間食肆、便利店和超市),街上比較清靜,尤其晚間更是近乎無人聚集,沒有香港屋邨童黨般的大吵大鬧,連市中心常見的乞丐也近乎在這些區域絕跡(應該是乞丐在這些區域都找不到生計吧),感覺上不太危險。我唯一遇過的「危險」事情,就是被幾個中東青年叫我不要拍照吧。就居住環境而言,雖然不太符合北歐標準,但樓宇不算很高,而且密度也比香港為低,更重要的是附近極多綠化環境如林木、草地、公園等,比得上新界豪宅的居住環境。值得留意的是,這些移民區除了在商場範圍外,是沒有裝上閉路電視系統和圍欄的。在較大型的區域如Angered,也可以見到規模不太小的商場,入面更竟然有比較高價的ICA超市(ICA是瑞典品牌,感覺大約是像香港的Taste吧,但通常不少人都是去像華潤般的廉價德國超市Netto和Lid’l的)。位於Angered區的Hammarkullen更發展出自己的獨特節日,每年五月尾均會舉辦揉合了移民文化的嘉年華會Hammarkullekarnevalen(The Hammarkulletorget Carnival),為哥德堡的年度盛事之一,可見社區的日常並沒有想像中的差。

 

北歐神話的另一面:大城市中的Ghettos

小朋友在公園中盡情地玩耍,攝於Hammarkullen。 

北歐神話的另一面:大城市中的Ghettos

如此密集的大廈在北歐少見吧。之所以很多天線碟是因為移民們都要收看祖國的電視節目,攝於Vårväderstorget。 

時至今日仍然奉行社會民主主義,並且貴為北歐四/五國龍頭的瑞典,比起其鄰國而言,還算抵擋得住新自由主義(Neo-liberalism)1和右翼排外主義的入侵2。縱然如此,它並不是完美的國度,它也擁有自己的社會問題,例如我在超市遇過一個移民逾十年的香港媽媽,她表示瑞典很難找到一份固定的工作3,而我的歐洲同學(包括荷蘭和德國人)也有表示過感受到輕微的排外情緒。北歐模式固然值得學習,但正如民主並非萬靈丹,北歐模式也是有它們的不足之處的。如何處理移民的議題,似乎在今日急速全球化,以及右翼主翼重新抬頭的年代,還需要更多的研究。 

北歐神話的另一面:大城市中的Ghettos

再來多一張密集的高樓大廈,攝於往Bergsjön途中的Beväringsgatan站。 

北歐神話的另一面:大城市中的Ghettos

Vårväderstorget的橋底塗鴉,好正面的意味,不知道是否政府Project? 

最後最後,全文重中之重的重點係,人地連Ghetto的居住環境都好撚過香港啲萬幾蚊呎所謂豪宅好撚多倍呀,香港人幾時先識醒,知道自己其實生活係豬欄,過緊非人生活? 

北歐神話的另一面:大城市中的Ghettos

Biskopsgården的新款住宅,我覺得同太古城有得揮! 

  1. 瑞典社會民主黨雖然有右傾的取向,而且採取過不少市場化措施,但整體而言福利制度仍然的根基並沒有被動搖。相反右翼政黨則被逼放棄「摧毀福利國家」的取態,轉為支持維繫瑞典的福利制度。
  2. 極右反移民的瑞典民主黨(Sverigedemokraterna,Sweden Democrats)直至2006年在國會大選中取得席位,支持率雖不斷上升至約13%,但仍未曾與任何政黨組織過執政聯盟。
  3. 瑞典現時失業率為8.4%,在鄰國中算甚高的水平

此文亦見於以下媒體:

http://www.vjmedia.com.hk/articles/2015/03/26/102988