瑞典南部都睇到極光既極光

文:北歐煉心

如果人同你講極光唔好睇,請同我掉佢落山。

話說前幾日無啦啦上網話有極光,我心諗,舊年我天寒地凍去到瑞典北部都睇唔到,你同我講走出街就有得睇?點知個個話睇到不止仲有圖有真相,嚇到我即刻熊貓.jpg,著件衫拎部相機就衝左出街。

北歐既森林仲多過seven eleven,梗有一間起左近,由於太想見到極光既緣故我一野就跑左入森林,入到深處先醒起其實睇完好似要搵路返出去。Anyway 我知極光會起北邊開始出現,望住北斗七星我就跑啊跑,最後跑到一個冇人冇燈既湖邊。心諗,呢個spot除左可能無啦啦有隻狼走出來或者有人來打劫之外,都冇咩缺點,今次仲唔俾我睇到?!

原來睇極光就同捉鬼就差唔多,未去到咒怨加椰子既級數肉眼都睇唔係好到,呢個時侯用相機一影,就會發現都唔知係唔係既綠色野。等左成半粒鐘,終於好似有少少野,但我都分唔到係唔係幻覺,係咪自己諗多左。相機一影,果然係有料到,不過肉眼睇就真係綠乜鬼色,fifty shades of greys 就有佢份。朋友起第二度睇:「我睇到極光啊,不過唔係極光囉」。我心諗,究竟係「唔係好光既極光」定係「好光既非北極光」呢,好難捉摸啊。算啦,極光同女神一樣,這輩子都不會有緣架啦。

但眼見身邊咁多勵志故事,等媽媽改嫁都等到做機師,我決定(搵朋友一齊)等落去。 等左陣,無啦啦前面一塊塊綠色飛出來,世界末日咁款,嚇到我鼻哥翁都冇綠!基督徒應該終於搵到上帝存在既證明,因為擺明係有人一筆一筆起天幕度畫畫!極光最好睇就係睇佢浮現消失,有如鬼魅既綠色畫布起天空中飄揚!點解冇人話我知極光真係咁好睇?而再過一陣,個天突然有幾條綠色既蛇起北斗七星旁蜿蜒溜過,我最期待的畫面出現了!

SONY DSC

有圖有真相!罕有的紅色極光

SONY DSC

北斗七星旁蜿蜒的綠蛇

驚喜一浪接一浪,每當我諗住走,都會有新一波。最後,北斗旁居然穿左窿倒瀉左顏料咁款,翡翠綠仲伴住緋紅進場,沿住天球放射開去!聽講紅色極光係最罕有!我果刻真係覺得人生充滿希望,好似無啦啦起天到跌左個女朋友俾我咁!極光真係好好睇,如果你叫我揀極光定女朋友,我一定揀女朋友!

SONY DSC
襯上遠處的小鎮倒是更美麗

SONY DSCSONY DSC

SONY DSC