丹麥講故佬Live Norish Event後有感

文: 丹麥講故佬

七月廿六號去左Live Norish event,會後聽到有人反映我地大多數時間都用黎講「What nordics do (北歐人做D咩)」而無咩點講「Why they do (點解佢地咁做)」,其實我原本想講埋,但係因為時間限制所以被逼跳過,今日呢篇文會講返我跳過左既「Why they do」。

記得有日飯後同host mother吹水,講到世界各地既稅收政策。北歐稅收一向係全球最高,所以我問host mom:「點解北歐收稅要咁高呢?」
Host mom係咁答的:「因為我相信我今日比既稅,係將來會用返係我身上。」

北歐人對於徵稅呢樣野完全唔反感甚至支持俾稅係有原因既,因為:
1. 佢地好清楚呢個世界無免費午餐,所有資源都係有限。
2. 佢地相信政府用錢會用得其所,唔會亂咁洗人民既錢。
3. 佢地相信佢地有權利亦有義務監察政府洗錢,出事個陣佢地係可以禁住政府唔比佢繼續出錯。

北歐天寒地凍,係冬天個陣需要好多既木柴,食物,水同衣物等等去度過寒冬,所以維京人會係夏天個陣儲好糧添好衣去準備黎緊四五個月既寒冬。隨著社會發展,北歐越來越多人,但係資源就係得咁多,咁點算呢?佢地要量入為出,好小心咁用佢地係夏天儲起既儲備,因為如果唔小心overspend的話,咁之後咪無炭用囉,所以北歐人一直都好小心計住自己用左幾多資源,而呢種量入為出既生存需要到宜家都深深影響住北歐人。

咁北歐人比咁多稅,其實去曬邊?我係丹麥究竟有D咩(https://live-norish.com/2014/03/01/丹麥究竟有尐咩-denmark-what-the-hell-is-inside/)呢個post裡面都講過,所以唔再詳述,但係呢D服務,未必同佢地有直接關係(例如一個唔諗住生細路既夫婦唔會需要9年強制教育),但係其實諗深一層,絕對有:

1. 教育方面:佢地如果無九年免費教育加之後既免費兼貼錢教育(所有丹麥公民一入高中gymnasium或者職業訓練課程就有大約四千港紙,如果唔同父母住就double)就唔會有今日既知識同技能,唔會因為經濟問題而被剝削機會;佢地自己既細路當然會有咁既待遇,但係如果無細路的話佢地都可以得益,因為佢地老個陣,服務佢地既正正就係佢地有份供養既下一代。

2. 健康方面:佢地由出世個陣就係開始比護士照顧,有病個陣無論大病小病睇症睇都係免費,一直到老,確保你健健康康繼續為社會貢獻;就算你無事都好,服務你既政府職員巴士司機餐廳大廚全部都係同一個系統照顧。

3. 生活方面:政府運作全靠稅收,公共服務運作咁高質素咁方便都係靠納稅人比錢;你今日俾稅,聽日服務你既政府職員唔會因為人工低到咩叉咁而對住你_口_面(請自行根據人工水平填充)甚至罷工。

所以其實一句講曬,好聽D就係北歐人比稅係為左保持社會穩定,難聽D就係北歐人俾稅係為左自己生活安康。好聽D就係福利社會主義,難聽D就係自己比錢用係自己度,視乎你點睇。我遇到既北歐人都係傾向前者,因為佢地唔追求物質,只求安穩生活,但係佢地追求既安穩生活絕對唔係蛇齋餅粽可以滿足既,點解呢?

因為北歐人教育水平高(特別係芬蘭,所有教育都係免費所以差唔多人人唔係Master就係PhD),佢地好清楚幸福係要自己爭取,有咩唔妥就要出聲,而佢地知道佢地有投票權同埋呢一票係可以改變國家(集腋成裘是常識吧),所以佢地好珍惜呢一票,積極投入選舉,務求唔做當權者口中既「沉默的大多數」被發聲,亦都唔會出現我討厭政治既羔羊(大多數係我討厭政客)。同時,佢地對歷史有一定既認識,清楚前人如何爭取幸福同埋極權主義加文化操控既危害,所以政府一推出就算係有D可能違反憲法既法案,人民就會即刻出聲反對,關於民生既可以同議會議員求助,關於勞工既就有非常強勢既工會(當然有為老闆出聲既商會),關於稅收既(特別係政府官員浪費公帑)就有納稅人協會,全部一齊插爆政府。政府唔聽點算啊?如果人民唔同意政府做法而政府係無誠意聽佢地既意見的話,佢地會遊行會絕食會公民抗命,由罷工罷學罷繳稅甚至暴動,全部有motive有規模有板有眼,全部自願加入,唔會好似某D簽名會咁可以用小恩小惠買簽名。另外,所有北歐國家都有公投法同埋彈劾法,三權分立做得好,人人皆知道既話,政府立法司法都唔會夠膽亂黎。

以上總總因素,令到北歐人肯出一半既糧交稅去換取各種各樣既福利,直到永遠,但係人民肯交稅,都要政府有一套好既制度鼓勵人準時交稅。大多數國家(英美大國呢堆呢)報稅既責任係你度,但係係北歐,個稅局會幫你睇曬所有資產包括個人收入(申報收入呢個係僱主既責任),銀行戶口(我中過招:https://www.facebook.com/storytellerindenmark/posts/679633628738846),房地產,車同股票期貨等等計個數比你,無問題就上網一click(瑞典甚至可以一個sms)自動係銀行過數,有問題佢地會比個專責你個case既職員既聯絡方法,打個電話或者send個email傾掂佢。呢個政策令到交稅非常之簡單,提高人民滿意度就自然個個都肯準時交稅,而佢地都好鍾意稅務局,因為無佢地,國家就唔可以正常運作。

係丹麥/瑞典/挪威文裡面,skat(t) 除左解稅,仲可以解寶藏。北歐既高稅率高福利Nordic Model,有好多其他國家都想偷師,但係天時(一個國家需要好長時間先可以變成一個福利國家,北歐搞左最少一個世紀,經過好多年教育北歐人先變成宜家咁)地利(北歐好多天然資源例如煤炭同油,加上北歐離歐洲大陸遠,戰火波及唔到北歐大陸)同人和(北歐人教育程度高,工作效率高,同埋有民主制度,政府真係做到野)三樣缺少任何一樣(尤其係人和)的話,只會變成跛腳鴨, 兩頭唔到岸,到時就仲衰。

但係如果有睇開live norish既讀者應該知道,北歐並唔係完美既,都會有禍害,(如果有人有興趣的話)下次再寫。

Sources:
“The Rise, Fall and Revival of the Swedish Welfare State: What are the Policy Lessons from Sweden?” Andreas Bergh, IFN Working Paper No. 873, 2011 http://www.ifn.se/wfiles/wp/wp873.pdf
“Why Swedes are OK with paying taxes”, Sweden.se,https://sweden.se/society/why-swedes-are-okay-with-paying-taxes/
同埋大量wikipedia articles

其實自從返新工之後(話時話我係做IT既)開始忙到拆天,呢篇稿我都拖左大大話話16日到,好對唔住 (編注: 小編遲了好絃星期才登)。我記得一個讀者係個event度同我講我既文比起其他live norish blogger既文章長,亦唔會只講生活細節而會探討呢d細節後面既意思 。我想係度多謝呢位讀者(同埋睇完呢篇文既你)支持我,我會繼續努力(如果精力容許的話),寫D其他人唔會寫既野。

(同時呢位讀者都話我講野無寫文咁流暢,呢D問題就無辦法 XD)

10359410_732285533473655_5348118866818003223_n (1)

學下圖文不符先

Distortion – CPH最大街頭派對

文: 丹麥講古佬

(原來Live Norish其他blogger既blog可以咁迷你,所以我都唔執輸寫返堆迷你blog以謝天華)

香港好似無咩街頭派對(最少我住左差唔多二十年都未聽過),上Google搵先發現原來LKF每年Halloween都有搞街頭派對,所以為左住係香港既朋友著想,係度介紹下究竟StreetParty係咩東東:

所謂既Street Party,就係係條街度開party,講完。

好,in a nutshell版講完之後,跟住入返正題: 哥本哈根每年都好多Street Party,但係最大既Street Party非Distortion莫屬。由1998年得個50幾個朋友仔到上年超過30萬人係哥本哈根街頭狂歡,可見丹麥人係幾咁鐘意開P。2000年開始變成有組織「罪案」混亂,變成五日街頭派對再加每晚一個Theme Party,搞左16年已經變得街知巷聞,為CPH(其實可能係全球)最大街頭派對。今年Distortion有超過一百間(目測官方網站跟住亂數的)bar同club響應,同埋竟然租左個游泳池,劇場,室內攀山場甚至一個海港囉黎開P,瘋狂程度比港女機場戰事式追星仲要激烈多一百倍。

Shahab-Mirsadri-2013.-DSC_9715

atmosGalleryThumb12 atmosGalleryFull11

我今年就係Distortion做義工,負責係Distortion開始之前擺堆標誌防止有人係條街度泊車(你係條街度泊車我地點樣開P,同埋如果有咩意外的話你架車就GG了),跟住開完P之後移走曬佢.每個標誌最少24kg重,所以有D女義工去到briefing都嚇窒左,不過我地有車有推車有男人所以其實無咩問題,同埋我地都需要有人係大本營組裝D標誌,所以其實男女都可以做,我地主要係Party前同Party後做野,所以常人唔會點見到我地,不過所有崗位既人都好重要架(shameless advertising mode)。

Distortion見!

atmosGalleryThumb8

 

atmosGalleryThumb9
Photo Credit: cphdistortion.dk

Photo: http://www.cphdistortion.dk/img/atmosGalleryFull11.jpg

FB: https://www.facebook.com/storytellerindenmark/photos/a.637298659639010.1073741828.636027769766099/698615023507373/?type=1&notif_t=like

丹麥究竟有尐咩? Denmark? What the hell is inside?

文: 丹麥講故佬

好多香港人對丹麥既印象就係藍罐曲奇同安徒生(BTW如果你知安徒生係丹麥人的話,恭喜你,你比99%其他香港人優秀XD) 講真,我嚟丹麥之前,對丹麥既印象同其他香港人差唔多,但係我係中四的時候曾經研究過我將來住咩地方好,無意中睇到瑞典官方網站(Sweden.se)關於瑞典既介紹,就比瑞典吸引左,狂去研究瑞典事物,所以對瑞典以至北歐既了解深左好多。

咁瑞典關丹麥咩事呢?原來丹麥國土曾經包括…瑞典,挪威,冰島,甚至英國,愛爾蘭同埋德國北部(雖然唔係統治左好耐),好多歐洲皇室都有丹麥國王克里斯蒂安九世(Christian IX)出品既皇室成員(包括事頭婆英女皇在內),堪稱歐洲公公(Father-in-Law of Europe)。

因為丹麥,瑞典同挪威係同一個大島上面,同一個起源(都係維京人)同埋歷史上有好長時間係同一個國家,所以文化上互相影響。所謂十里不同音,百里不同俗,到左今時今日,三個國家語言上有一定分別,但係大家都可以(基本)明白對方講咩野,而文化上都無咩大分別,所以你可以用對一個國家既知識通行北歐五國。

講返丹麥,丹麥依家包含本土五個大島:

日德蘭半島(Jutland,丹麥話: Jylland),

菲英島(Funen,丹麥話: Fyn),

西蘭島(Zealand,丹麥話: Sjælland),

洛蘭島(Lolland)同博恩霍姆島(Bornholm),

加上兩個自治區:法羅群島自治區(Faroe Islands,丹麥話: Færøerne)

同格陵蘭自治區(Greenland,丹麥話: Grønland,Grøn = Green綠色),總共42959平方公里,相等於39個香港。

我住係哥本哈根(Copenhagen,丹麥話: København,Køb = Buy,成個字可以解做Merchant’s Habour),係Zealand度,而安徒生就住係歐登塞(Odense)度。丹麥鐵路運輸系統發達,由København去Odense只需75分鐘,去Jutland最大城市奧胡斯(Aarhus,丹麥人通常叫Aarhus,但係有人叫Århus)只需3個鐘,去德國漢堡同柏林都只係4至6 個鐘,所以穿洲過省非常方便,但缺點係貴,København去Odense成人價276 DKK(折合388港紙),去Aarhus成人價382 DKK(折合537港紙),青年人無ISIC同WildCard/WunderCard等既折扣卡(另文)搭車基本上係倒自己錢落鹹水海,點解呢?丹麥鐵路系統有好多部分(特別係Jutland)都仲係非電氣化,所以部分路段需要用燃油推動,而燃油係丹麥係極貴,加上丹麥國鐵DSB係獨立公司,燃油費用就唯有轉嫁比乘客。

呢個,都係我初到丹麥既印象:所有野都都好 _ 貴!

記得初初到host family屋企的時候,我同host brother走左去當地超級市場netto附近個自動提款機(丹麥話:pengeautomat,penge = cash,automat唔洗解釋掛啦XD)噤少少錢用住先,跟住順便去睇下物價,當時睇到500ml可樂價錢真係嚇一跳:15dkk一支(折合21.1港紙),係香港既三倍!隨住時間流逝,我發現所有野都比香港甚至其他歐洲國家貴:

(括弧為折合價)

kinda3隻裝出奇蛋:22.5 (32) m&m 45g:27 (38)

一公斤免治牛肉:低脂 60 (85.2) 高脂 50 (71)

一公斤免治豬肉:低脂 65 (92.3) 高脂 56 (79.5)

一公斤米:15 (21.3)

一支啤酒(500ml):3.5 (5)

一公升牛奶:9 (12.8)

650g雞柳:57 (80.9)

800g白方包:13 (18.5)

750g有機洋蔥:12 (17)

一條蔥:5 (7.1)

500g蘑菇:11 (15.6)

一條青瓜:12 (17)

一個芒果:13 (18.5)

500g花生:25 (35.5)

(BTW 係丹麥睇場戲都要70 – 100 DKK (99.4 – 142),所以係丹麥食住花生等睇戲最低消費都要百四港紙:o))

Lays 200g 薯片:21(29.8)

合味道杯麵:10 (14.2)

kfc兩件雞餐:68 (111)

麥當勞big mac餐:56 (78.8)

Cafe大latte:30 (42)

酒吧啤酒:50 (70.4)

500ml可樂: 14 (19.9)

點解咁貴呢?因為丹麥差唔多所有野都會收稅,由最common既VAT(Value Add Tax 增值稅,呢度叫merværdiafgift,通常縮寫成moms)同薪俸稅,到比較奇怪的稅例如Church Tax(如果信教就要比)同Cow Flatulence Tax (牛放屁稅,其實應該係跟住環境污染稅收取的),你四份一至一半收入都係用嚟上繳比政府。好似好衰咁,但係其實尐稅收係囉嚟用係教育(由小學到大學都係免費),醫療(所有係丹麥住,有Residence Permit既人都可以享有免費醫療服務,藥物可以折扣價買),退休保障(丹麥人退休年齡為65/67歲,每年可以收到大約65500至69500 DKK(折合十萬港紙)退休金),失業援助金(每星期最多3940 DKK(折合5607港紙))等等。 但係眼見其他國家稅率都無丹麥咁高,點解要收咁高稅呢?最大原因就係因為丹麥公務員佔全丹麥勞動人口30%,而第二個原因就係因為政府唔想人民接觸太多對健康或環境有害既物品,例如丹麥政府唔想人民揸咁多私家車,所以就收180%註冊稅(唔好唔記得25% VAT)同收超高能源稅(一公升汽油今日出面賣緊11.5 DKK(折合16.17港紙)加26.55 DKK(折合37.34港紙)能源稅,每公升總共53.5港紙,貴過香港3倍),令到大家用多尐公共交通工具。

但係唔係個個都受呢?當然唔係啦,有尐稅仲曾經仲搞到個個人都逃離丹麥添。丹麥曾經係2011徵收脂肪稅加提高糖稅同啤酒稅既稅率,原意係想人飲少尐啤酒同食得健康尐,但係政策出台之後,丹麥人唔單止唔理,仲率領大軍去德國同瑞典掃貨逃稅,間接令到本地農夫同埋食品公司難以生存(因為來佬貨仲平過本地貨),所以實行左一年就撤銷啦。

講到啤酒,大家成日新聞聽咩德國唔知邊度有啤酒節啊咁,就可能自自然然覺得德國人最飲得,或者你睇開美國電視例如Family Guy的話就應該覺得愛爾蘭人最飲得,但係丹麥人飲啤酒瘋狂程度係絕對唔可以忽視,而丹麥人飲酒同社交文化等息息相關,下次再同大家開心share。

圖為丹麥杯麵collection

1095022_639250206110522_94399529_n
丹麥講故佬 Facebook

博客介紹 – 丹麥講故佬

60865_636030243099185_1792812844_n

是咁的,我係一個香港Exchange Student,今年留喺丹麥。

開page,近排又比較無聊,所以開始寫下文,希望以後有閒餘時間update下,分享下丹麥的新奇事同埋share下我自己的故事。

丹麥唔係只得藍罐曲奇。

I’m an exchange student from Hong Kong, and I’m staying in Denmark this year.

Being utterly bored these days, I decided to start writing articles and things, hoping that I would be able to share stories of my own here. Hopefully I’ll still have time to update this page in the future.

And well, Denmark is not all about Kjeldsens Cookies.