[旅遊篇 – 丹麥的烏托邦]


文: 香港男孩在丹麥

最近全球嘅新聞焦點都集中係英國脫離歐盟身上,雖然反對嘅聲音四起,但係英國離開歐盟已成定局,是好是壞亦需時間為大家帶來一個答案。

而另一邊廂歐盟成員國之一嘅丹麥,其實係佢嘅國土上都有一片非歐盟領土,呢個地方叫做Christiania。

Christiania 全名為 Fristaden Christiania (Fristaden解作Freetown自由城)。Christiania位於丹麥首都哥本哈根Christianshavn區。人口大約850人,面積為0.34平方公里。1971年一班反對丹麥房屋問題嘅示威者以及70年代普及嘅嘻皮文化反政府人士佔據咗哥本哈根一個空置嘅舊軍營,劃地自居並樹立自己旗幟,宣佈對該地區有統治權。並係該年嘅9月26日由其中一位居民 – 自由新聞工作者Jacob Ludvigsen於佢出版嘅報章Hovedbladet宣布Christiania獨立。

Christiania 推行無政府主義,並擁有自己嘅貨幣、旗幟、法律。社區唔受丹麥法律管治,所以直到1994年之前,居民都冇需要向丹麥政府納稅。之後Christania地方代表同丹麥政府達成協議同意居民繳交費用去換取水電供應。

Christiania一直同丹麥政府關係緊張,其中一個因素係因為Christiania成為丹麥主要嘅大麻供應市場,所以丹麥政府多次嘗試收回土地並同Christiania進行法律訴訟,尤其是2011年雙方談判更加一直進入僵局,居民更加將Christiania停止對外開放,但係後來雙方達到共識,居民籌集資金以低於市價價錢正式購買土地,成為土地合法擁有者。令呢個丹麥領土入邊嘅烏托邦得以保存。

由於長期缺乏資金維修,所以入邊嘅佈局同埋建築物都系殘破不堪,而差唔多每一組建築物上面都充滿咗藝術家嘅塗鴉,冬天Christinania街上更加充滿咗用石油筒造成嘅火爐,彷彿置身係災難電影入面嘅末日世界,同外面哥本哈根市中心華麗整齊嘅佈局形成強烈對比。加上入面充滿奇裝異服嘅居民,成個地區彷彿就好似一個流動嘅藝術博物館。Christinania係聖誕節嘅時候入面仲會有哥本哈根其中一個主要Christmas Market。Christinania另外其中一個特色係喺入口位置會有一個拱門上面寫住”You are now leaving the EU” ,出口又會寫住”You are now entering the EU”去強調Christiania係一個獨立社區。入面仲有導遊服務帶你遊覽同埋介紹Christiania。

Christiania雖然係一個自治區,但係其實係好安全嘅,但係要緊記遵守入面嘅規矩,例如入面係唔准影相同埋錄影,特別係Pusher Street一帶主要嘅大麻售賣場所。所以入去之前要留意喺門口嘅一個” Do’s & Don’ts告示。

而前往Christiania非常方便,只要乘搭地鐵Metro喺Christianshavn Station落車然後行大約五分鐘就會到達。

13603408_1818392138389451_3299613838314119389_o