有乜好過去camping – 挪威篇 II】在那遙遠的campsite

文: I’m not a backpacker

尋日提到去挪威camping要注意幾點：防蚊、防雨同唔好亂捉三文魚食，今日就再講多個特別嘅campsite俾大家知－在那遙遠的campsite。哩個campsite有幾遙遠？！就係遠到歐洲大陸最北邊嘅天涯海角咁遠嘅北角 (Nordkapp)。無錯，係北角，唔係大家食雞旦仔果個北角，而係挪威自稱歐洲大陸板塊最北嘅地方，實情應該係最最最北嘅建築物這說法較為準確點。

Any肥，無論里個點係唔係歐洲大陸最北點，Nordkapp已夠吸引每年數以萬計嘅旅客前往遊覽，而大部分嘅旅客是因慕「子午太陽」之名嚟到北角哩個咁遙遠嘅地方。前往北角必須經Honningsvåg，再坐接駁巴士來回北角。Honningsvåg係一個好美麗嘅城鎮，每年約有4個月處於永畫日不落狀態，我一直都疑問係夏天太陽不落時，應該當地人係返工返學嘅好時份先係架，誰不知挪威人嘅想法剛好相反，夏季有太陽就應該放假去玩，爭取更多時間同太陽玩遊戲，反而冬天大雪天時小朋友就如常返學，喺攝氏負40度之下仍然會係室外玩滑梯(紀錄片係咁描述嘅呢）。大家可以由Alta坐巴士或者坐飛機到Honningsvåg，又或者高貴啲坐郵輪都得嘅。當然，除咗直接由挪威內陸前往北角之外，亦可以由芬蘭北部坐巴車到北角嘅。